تاونات ما بعد الحبس والغرامة

زجل: المودن أحمد

هدُّونا بالحبس والزْعِيمْ فينا سجنوه...
خوفونا بالزلط حيت الملايين غَرْمُوه.
خفنا على راسنا لنتبعوه...
قلنا لهم بصوت ضعيف يلاَّه سمعوه:
ها فُمنا مسدود ويلا بغيتو نخيطوه ...
ياك الفم المسدود الدَبَّانْ مَيْدَخلوه؟!
..........
قالونا : كِجاتكمْ تاونات يا الفُهامة؟
قلنالهم: بْحايْلا راحنا فالسويد وخَّا هي غِ حلامة...
جنة خضرا ديك الشي ديال العظمة...
الخير موجود والتنمية مُستدامة...
مَكَايَنْ شكايات مجهولة ولا عندنا شكامة ...
الكودرون من غفساي حتى لكتامة ...
نابت فجنبو  النوار والخزامة ...
الفلاحة زاهية والناس خدامة...
لا رشوة لا وجهيات لا ظلامة....
المسؤولين ملائكة نزلوا من السما
أولياء الله صالحين كُرَمَا
والدولة مزيانة الله يزين لِيَامَا
............
مْبَرْعِينْ فالجبال كِالنعامة...
الراس فالتراب والرجلين فالسَّمَا...
مدعرفشي منا العياشي من شامة...
كلشي قاري كلشي عُلاما...
مبغينا ضو ولا طريق ولا مَا...
بغينا ليكم غ الترفيهة والسلامة...
والله يجعل البركة فالميزان، لامبة...و الحمامة.
.........
إيوا كجاتكم هاد المنامة؟
 
                               

بلادي يا بلاد بني زروال

بقلم المودن أحمد من المشاع بودكة تاونات.

كَانْ يَا مَكَانْ...
فَبْلادْ بْنِي زَرْوَالْ يا لَخْوان.ْ
عُلَمَاء وْفُقَهَاء وَرْجالْ شَجْعَانْ
والعْيَالَاتْ نِعْمَ النَّسْوَانْ.
الجْوَامَعْ عَامْرَة طَلْبَة مَنْ كُلْ مْْكَانْ
والزَّرْوَالِي نَخْوَة وْهَمَّة وْشَانْ...
واليوم حَالُو مَسْكِينْ يْشَفِّي العَدْيَانْ
لَاهُوَّ كَسَّابْ وَلَا هُوَّ حَارَثْ فَدَّانْ.
........................................
 الجبلي مَيْحَسْ باﻷَمَانْ
مَقْمُوعْ مَسْدُودَة فْوَجْهُو البِيبَانْ
آشْ الفَرْقْ مَا بِينْ وَدْكَة وْ إيفْرانْ؟
آش الفرق بين غفسايْ و طانطانْ؟!
الحبيبة بلادي عَمْرَاتْ بَشَرْ فَنْيَانْ
تَالَفْ بِينْ تْراكتُورْ، لَامْبَة، الكتابْ والميزانْ
على البارصا والرِيَّالْ يَتْصَارْعُو الشُبَّانْ
مَجَايْبينْ خْبَرْ لحالة الطُرْقَانْ
ولا لشْعِيرْ البْهَايْمْ اللي كْلَاوَهْ العْرِبَّانْ.
....................................
كايَنْ لِّي رْحَلْ وْغَيَّرْ لَمْكَانْ
كاين اللي غْبَرْ مَا بَانْ
كاين اللي خَرْدْلاتُو خَرْدَالَة مَزْيَانْ
رْجَعْ تَايَهْ وَحْدُو يَدْوِي زَعْفَانْ
وْحَالُو يْشَفِّي العَدْيَانْ
التِيُّو، المَا، الخنادق وأَفَرْطَانْ
كُلْشِي يْبَسْ كُلْشِي رْجَعْ فْخَبَرْ كَانْ.
..................................
أَيَّاهْ يَا بْلَادِي يَا زِينْةْ البُلْدَانْ
مَاتُوا فِيكْ الرْجَالْ الشَّجْعَانْ
اللِّي طَرْدُو الفْرَنْسِيسْ و الإسْبَانْ
الزَّرْوَالِي مَنْ خْيَالْ جَدَرْمِيَّة هَرْبَانْ
مَسْجُونْ فَبْلَادُو مَحْكُّورْ مَزْيَانْ
التُّهْمَة جَاهْزَة والحُكْمْ غِيَّابي بَانْ
الرْجَالْ فَبْلَادِي رَدُّوهُمْ خَرْفَانْ
أدَاوْ الصُّوفْ وْشَرْبُو دَمْ الدْبِيحَة كِسَانْ
.................
مَاكْفَاهُمْ الكيف العادي زادُونَا خَرْدالَةْ
طَالَبْنَا بْحُقُوقْنَا خَرْجُونا زَبالََة
قالُونا بِهَا غَدي تَزْيَانْ الحَالَة
ويَرْجَعْ الخْروفْ مَنا حَلوفْ بَالآلَة
الحمارة ترجع ايكولوجيا غزالَة
هَادشِي مَا خْراجْ فْحَقْ جْبْالْة؟
غ الزبالة وخردالة و الدربالَة
إيوَا هادي هي الحقوقْ وإلاَّ فَلاَ...

القصيدة الزجلية بالصوت و الصورة هنا:

 

 https://youtu.be/jEYRA76EWho