مسرحية تشكيل الحكومة

نص ساخر بقلم المودن أحمد من غفساي.

الفصل الأول

على الخشبة رجل كهل بيده مقراع وباليد اﻷخرى سبسي ...يلبس جلبابا صوفيا...وهو في حالة تخذير بَيِّن.
يدخل عليه التيجاني وهو يحمل جريدة، ثم يخاطبه كمن يبلغه خبرا عاجلا:
التيجاني - عمي احميذو...عمي احميذو...راهم شَكْلُو الحكومة.
احميذو - وعلاش شَكْلُوها مسكينة، ياك تَخَلاَّوْهَا مطلوقة وْكَانْ...
التيجاني - أعمي احميذو أنا كنتكلم على الحكومة دالبلاد...
احميذو - إييه... هديك اللي كانت مْشَكْلَة هادي خمس شهور...و طلقولها فْخَمْسِيَّامْ ... مالهم عاود تاني شكلوها ؟!
التيجاني - أعمي احميذو الله يهديك فيق من النعاس...راهم قسموا الوزيعة وكلها وْشَنُّو عَبَّا...
احميذو - إيوا وحنا آش خرج فينا من هاد الوزيعة؟!
التيجاني - احنا مَمَحْسُوبِينْشْ عليهم...حيت حنا مع العالم القروي والتنمية البشرية و داك الشي...
احميذو - آه راني فهمت ...حنى كيفكرونا حتى لليام دالبرد...و يعطيونا البطانيات و الجلالب و القوالب...ويصورونا ..هههه...حنا كيفكرونا غ فليام د الانتخابات!!!
التيجاني - الانتخابات راها واجب وطني أعمي احميذو...
احميذو - إيوا و الطريق و الصحة و التعليم و المشاريع مكنسالوشاي فيهم؟!.. أولا هادوك مشي حق وطني؟!...
واش مزال مفكرونا احنا فهاد لجبال منسيين بحايلا ماشي مغاربة؟!
واش مكيحسوش بنا...و يشوفو من حالنا، حنا مساكن هنا مْشَكْلِينْ وشابعين مشاكل ؟!
يسدل الستار...
وإلى اللقاء في الفصل الثاني...
ملحوظة:
-هذا ليس مشروع نص مسرحي...بل مجرد تعليق ساخر على المسرحية الحقيقية التي نمثل فيها أدوارنا مرغمين.
- " شَكَّلَ " في اللهجة الجبلية يعني " قَيَّدَ "...